فاتن نسمان

“انا وفاتن نسمان النا صحبة اكتر من ١٠ سنين وكنا نحكي بدنا نصير عجايز واحنا صاحبات.”
“حفلة تخرجها كانت يوم ٧ أكتوبر كانت كتير متحمسة ومتوترة ، وسهرنا ليلتها انا وياها نخطط شو بدها تعمل بكرة وكيف تجهز حالها للحفلة ، وتاني يوم صبحنا بالحرب ابوها حكالها: “شكلك حتتخرجي من الدنيا يا فاتن”.”
“فاتن كانت شخص بيهتم بالتفاصيل ، جميلة وبتحب كل اشي يكون” بيرفكت” وحلو زيها ، بتحب الحياة وبتحب تلبس وتختار احلى اواعي . كانت روحي ورفيقة دربي، كتير كنت اتناقر معها بس هي كتير طيبة دايما هي اللي تيجي تراضيني.”
“بتحب الضحك فاتن ودايما تشاركني “ريلزات ” ع الانستغرام لما تعجبها او تبعتلي اماكن نروح عليها، مرة بعتتلي فستان الفرح اللي نفسها تلبسه بس تتجوز والكندرة وتسريحة الشعر حتى المصورة اللي بدها تتصور عندها. كتير كنا مخططين اشياء نعملها مع بعض”.
“كانت مدللة، أخوتها الشباب كانو يحبوها كتير لما كانت تيجي سيرة الزواج اخوتها يزعلوا كيف حتروح وتسيبهم، بس في تاريخ 10 ديسمبر كلهم رحلوا لمكان ثاني، استشهدت فاتن وكل اخواتها وعيلتها.”
رسالة وصلت منصتنا من صديقتها المقربة كفاح عياد، التي تظهر معها في الصورة.